Nú liggja fyrir tölur um greitt útsvar í staðgreiðslu frá janúar til október á þessu ári. Um er að ræða útsvar sem lagt er á tekjur sem aflað var á fyrstu 9 mánuðum ársins, þar sem álagt útsvar í janúar er vegna tekna í desember 2019 og þær tekjur færast í ársreikning 2019.
Útsvar í staðgreiðslu hækkaði um 2% frá sömu mánuðum í fyrra. Á sama tíma hækkaði vísitala neysluverðs um 2,6% og launavísitala um 6%, en launakostnaður er um helmingur útgjalda sveitarfélaga. Í fjárhagsáætlunum fyrir árið 2020 gerðu sveitarfélög ráð fyrir að útsvarstekjur myndu hækka um 5% og tekjuhlið fjárhagsáætlana þeirra er því í reynd hrunin. Í eftirfarandi töflu er sýnd breyting útsvars eftir landshlutum. Þar er borin saman innheimt staðgreiðsla á tímabilinu febrúar til október árin 2019 og 2020, sem tekur til tekna sem aflað var á fyrstu 9 mánuðum viðkomandi ára.
Breyting útsvarstekna febrúar - október 2019 og 2020
| Landið allt | 2,0% |
| Höfuðborgarsvæðið | 2,1% |
| Reykjavík | 1,0% |
| Önnur á höfuðborgarsvæðinu | 3,5% |
| Suðurnes | -1,3% |
| Vesturland | 1,0% |
| Vestfirðir | 2,0% |
| Norðurland vestra | 3,3% |
| Norðurland eystra | 2,5% |
| Austurland | 2,9% |
| Suðurland | 3,7% |
Eins og taflan ber með sér er þróunin nokkuð mismunandi milli landshluta. Vegna mikils atvinnuleysis lækka útsvarstekjur sveitarfélaga á Suðurnesjum milli ára um 1,3%, samanborið við hækkun á landinu öllu um 2%. Tekjubrestur er verulegur í þeim sveitarfélögum sem helst hafa reitt sig á ferðaþjónustu. Þannig lækkar útsvar um rösklega 10% milli ára í Mýrdalshreppi, um 7% í Skútustaðahreppi og tæplega 6% í Skaftárhreppi.