Góð rekstrarafkoma og miklar fjárfestingar

Samantekt hag- og upplýsingasviðs úr ársreikningum 10 stærstu sveitarfélaga landsins leiðir í ljós, að afkoma var á síðasta ári góð og fjárfestingar miklar. Fjárfestingar jukust í A-hluta um 36% frá árinu 2017 og rekstrarafgangur svaraði til 4,2% af heildartekjum, sem er jafnframt aðeins betri árangur en árið áður. Veltufé frá rekstri nam 11,2% af heildartekjum árið 2018, samanborið við 10,2% árið áður, 11,7% árið 2016 og 12,7% árið 2015.

Fjárfesting var umfram það sem reksturinn skilaði og var að hluta til fjármögnuð með lántökum. Þá luku flest sveitarfélög uppgjöri við Brú lífeyrissjóð með lántökum á árinu og hækkuðu skuldir því einnig um það sem þeim nemur. Í krónum talið jukust skuldir og skuldbindingar A-hluta um 8,4% og hækkuðu sem hlutfall af heildartekjum úr 109,6% í 112,4% á milli ára.

Þegar fyrirtækjum og stofnunum í meirihlutaeigu sveitarfélaga, B-hlutanum, er bætt við A-hlutann fæst samstæða sveitarfélaga. Rekstrarafgangur af samstæðu 10 stærstu sveitarfélaganna nam á síðasta ári 6,2% af heildartekjum, sem er talsvert lakari niðurstaða en árið áður þegar rekstrarafgangur var 11,5% af tekjum.

Þennan umsnúning má alfarið rekja til OR og þeirra sveiflna í afleiðum á álverði sem bókaðar eru í reikningum fyrirtækisins. Þessara áhrifa gætir ekki í veltufé þar sem tenging við álverð hefur ekki áhrif á fjárstreymi. Veltufé frá rekstri samstæðnanna nam 19% af heildartekjum árið 2018 en 17,5% árið áður. Hafa ber í huga að Orkuveita Reykjavíkur (OR) er langstærst allra B-hluta fyrirtækja og eru rekstrartekjur þess töluvert meiri en tekjur Kópavogsbæjar, svo að dæmi sé tekið.

Þá dró heldur úr fjárfestingum í B-hluta á árinu 2018 og munar þar ekki hvað síst um minni fjárfestingar hjá OR. Sökum aukinna fjárfestinga í A-hluta, aukast þó heildarfjárfestingar samstæðnanna á milli ára. Námu fjárfestingar samstæðnanna 18,5% af heildartekjum árið 2018 en 17,1% árið áður.

Tíu fjölmennustu sveitarfélög landsins eru Reykjavíkurborg, Kópavogsbær, Hafnarfjarðarkaupstaður, Akureyrarkaupstaður, Reykjanesbær, Garðabær, Mosfellsbær, Sveitarfélagið Árborg, Akraneskaupstaður og Fjarðabyggð. Í þessum sveitarfélögum búa um 80% landsmanna.

Í meðfylgjandi töflu eru tekin saman helstu atriði úr ársreikningum. Taflan sýnir samtölu þessara tíu sveitarfélaga og tölur ekki blásnar upp til heildar.

Ársreikningar allra sveitarfélaga munu liggja fyrir innan skamms á samræmdu formi og mun hag- og upplýsingasvið gera þeim skil í fréttabréfi síðar í næsta mánuði.

• Góð rekstrarafkoma og miklar fjárfestingar
• Úr ársreikningum 10 fjölmennustu sveitarfélaga landsins (tafla) - pdf

Úr ársreikningum 10 fjölmennustu sveitarfélaga landsins